Die Oranjerivier by die Voortrekkermonument werk op Lesufi se senuwees.

Die Bela-protes die afgelope Dinsdag by die Voortrekkermonument was ‘n reuse sukses met meer as 10 000 mense wat saamgestap het.

Daar is ‘n treffende foto wat gister groot op Beeld se voorblad gebruik is met die bewoording “Bela is boos”. Die foto is waar ‘n groep leiers ‘n reuse banier vashou waarop staan #StopBela. Agter die banier is daar duisende mense wat soos die Oranjerivier lyk en deel is van die optog.

‘n Soortgelyke foto verskyn op Maroela Media by die artikel  DA eis Ramaphosa moet Bela-belofte nakom

“Aangesien die president aan belanghebbendes verseker het dat ’n konsultasieproses gevolg sal word om die omstrede klousules op te los, moet hy by hierdie verbintenis hou en bewys dat dit nie ‘n leë belofte was nie.”

Die reuseopkoms  eers voor die Voortrekkermonument en toe met die optog het die sosiale media aan die gons. Op Facebook was daar honderde plasings van persone wat die optog bygewoon het met foto’s.

Op X het sake warmer geraak met woorde soos:

• Afrikaans, Bela, “Orange” (oranje) wat getrend het.

Daar was selfs ‘n verdwaalde vierkleur wat gou verwyder is wat moes dien as weerligafleier toe ‘n joernalis dit beskryf het as die oud landsvlag en Cosatu kapsie gemaak het.

Opvallend is dit die kleur oranje wat die gesprekke aan die gang gesit het. Op X het Dirk Hermann @SolidariDirk  getweet: “Ek is oranje.” Die tweet is vergesel met ‘n groot oranje grafika en is gou opgevolg deur soortgelyke tweets.

The Citizen berig: ”Ontleder Piet Croucamp het gesê die oranje kleur van AfriForum wat vir die geleentheid gekies is, was ongelukkig en slegte PR.”

Waar Croucamp die bal mis sit is dat oranje nog altyd die kleur was wat Solidariteit sedert 1999 in hul logo gebruik. Toe AfriForum hul logo ontwerp is die oranje tradisie voortgesit en die kleur oranje sal jy vind in al die organisasies wat onder die sambreel van die Solidariteit Beweging val.

Dit is verstaanbaar dat die 10 000 plus opkoms by die Bela-protes op die ANC se senuwees werk en dat die protes heelwat groter was as die Cosatu seksie 77 staking wat ‘n maand gelede gehou is. Hier was Cosatu net ‘n skaduwee van vorige optogte wat veral onder die Vavi era plaasgevind het.

Gister het Panyaza Lesufi, premier van Gauteng,  'n beroep op president Cyril Ramaphosa gedoen om die twee oorblywende omstrede klousules van die Wysigingswetsontwerp op Basiese Onderwyswette (Bela), wat deur sommige partye gekant is, te onderteken.

Dit nadat president Ramaphosa 3 maand eenkant gesit het vir Bela onderhandeling. Na Dinsdag se reuse optog moet die druk verskerp dat Bela verwerp moet word. Bela is die grootste toets vir die RNE. Minister Gayton McKenzie wat ‘n memorandum ontvang het, het opgemerk “Suid-Afrika ons is in vir ‘n treat”. Daar gaan nog baie Bela gesels en gestry word.