Episode 368 - Snoepies gesluit by skole in Gauteng

Netwerk 24 berig KYK | Spaza-kos eis al 23 kinders in Gauteng: Pas wet toe – Lesufi

Panyaza Lesufi, premier van Gauteng, het Sondag met burgemeesters en senior munisipale amptenare vergader om te benadruk dat hulle verordenings en regulasies oor eetgoed by skole se snoepwinkels en informele handelaars moet toepas.

Die vergadering is belê om te sorg dat daar aan standaarde vir voedselveiligheid voldoen word in ooreenstemming met wetlike vereistes en op ’n wyse wat openbare gesondheid en veiligheid bevorder, aldus Lesufi.

Hy sê die provinsie het 441 gevalle van voedselvergiftiging gehanteer en sedert Januarie is 23 leerlinge dood. Die leerlinge het kos geëet wat hulle by informele handelaars en spazawinkels gekoop het.

• Reaksie

Maroela Media berig: Verbod op kosverkope by skole ‘te drasties’ AfriForum het die Gautengse onderwysdepartement in ʼn dringende skrywe versoek om gemagtigde verkopers wat kan bewys dat hulle aan alle voorskrifte beantwoord, toe te laat om die verkoop van voedsel te hervat.

AfriForum versoek opheffing van verbod op kosverkope deur gekeurde verkopers by skole

AfriForum is ernstig bekommerd oor die onlangse vlaag van voedselvergiftigingsgevalle waardeur leerders geraak is en betuig innige meegevoel met almal wat familielede as gevolg hiervan aan die dood afgestaan het, of self siek geword het. Terselfdertyd is AfriForum ook bekommerd oor opdragte deur provinsiale onderwysdepartemente wat die verkoop van voedsel op skoolterreine verbied. Die Gautengse Onderwysdepartement is die mees onlangse instelling wat so ’n opdrag uitgereik het.

Maroela Media berig: Verbod op kos by skole: Departement tree ‘in isolasie’ op  Die Federasie van Suid-Afrikaanse Skolebeheerliggame (Fedsas), het Vrydag gesê die departement is nie by magte om hierdie bevele op skole af te dwing nie – allermins nie by wyse van ʼn nuusbrief nie.

• Gif gebruik

CarteBlanche wys uit:   Panyaza Lesufi, premier van Gauteng, het Sondag wysigings aan die Wet op Plaaslike Regering Munisipale Stelsels (2000) aangekondig. Die Wet, wat informele handelaars (soos spaza-winkels en snoepies) reguleer, het ten doel om die toename in voedselvergiftiging aan te spreek. Soos berig op CarteBlanche, is een van die hoofkwessies egter die verkoop van onwettige plaagdoders deur verkopers regoor die land. Terbufos ('n hoogs giftige plaagdoder wat net in die landbou gebruik mag word) en aldikarb ('n verbode middel in Suid-Afrika) word steeds openlik vir huishoudelike gebruik verkoop. Die onwettige verkoop van hierdie chemikalieë word nie in die gewysigde verordeninge aangespreek nie.