Episode 387 - Die laaste Beeld.......................

• Vrydag verskyn die laaste Beeld.

Beeld het vanjaar 50 jaar as koerant gevier. Net nadat die verjaarsdag gevier is, is die nuus bekend gemaak dat Beeld en Rapport gaan sluit en die enigste Media 24 koerant wat nog uitgegee gaan word is Die Burger is. Dit is ‘n besluit waarmee ek nie saamstem nie en ‘n hartseer dag vir Afrikaans.

• Media landskap verander

Beeld se sirkulasie in 2014 was 59,544 eksemplare teenoor 18,865 eksemplare in 2024. Dit is ‘n afname van -68.31% oor 10 jaar. Media 24 het aangetoon dat hul ‘n groter fokus wil plaas op die webwerf Netwerk 24.

• My kennismaking in met Beeld.

In 1985 in my standerd 8 jaar by Hoërskool Warmbad het ek begin Beeld lees. Ek het in die koshuis gebly en my Pa wat op die Springbokvlakte geboer het, het my ingeteken. Om te leer koerant lees en te probeer verstaan wat in die wêreld aangaan is waarskynlik soos ‘n baba wat leer sit, kruip en dan loop.

In daardie jare was die politiek op sy kop met ‘n verbete stryd tussen die NP en KP. Die begrippe verlig en verkramp het die era beskryf. Daar was die grensoorlog en diensplig.

Die spotprente wat vir my snaaks was het ek uitgeknip en teen my koshuis muur geplak.

In 1988 en 89 het ek diensplig gedoen. In my 1ste diensplig jaar  was daar geen koerant nie en het in 1989 het ek weer Beeld begin lees. Koerante wat bygekom het was die Sowetan, New Nation,  Mail & Guardian en Vrye Weekblad.

• Koerante en joernalistiek

My liefde vir koerante het gemaak dat ek BA Kommunikasiekunde aan die Puk gaan studeer het in 1990. Aan die einde van die 1990 is ek ook aangewys as Die Wapad se redakteur.  Dit was ‘n studentekoerant wat aan voornemende joernaliste die kans gegee het om hul joernalistiek te beoefen. Met die uitgee van Die Wapad het ek ook begin foto’s neem. Dit was nog die dae van film.

Na universiteit het ek gaan boer en die lees van koerante was nie ‘n prioriteit nie. Ek het darem weekliks nog die tydskrifte Times en Newsweek ontvang met die pos.

• Solidariteit dae

September 2001 het ek by Solidariteit begin werk in die media departement. Dit was die tydperk net nadat die MWU omskep is na Solidariteit.  Publisiteit was skraps. Dit was egter ‘n noodsaaklikheid om jou stem te laat hoor. Oor die jare het ek kontak gehad met baie joernaliste by Beeld.  As fotograaf het my foto’s so nou en dan ook Beeld gehaal.  

Daar was  ‘n sêding. “As jou storie nie op Beeld se voorblad is nie, dan het dit nie gebeur nie”. Vrydag word afskeid geneem van ‘n era. Mens gaan eers besef wat jy verloor het as jy dit nie meer het nie.

Aan elke Beeld en Rapport joernalis. Sterkte met die moeilike tyd. En om ‘n aanhaling te gebruik wat een gebruik het vandag:  Koos du Plessis se " Groet sonder woorde." - "Laat ons nie praat nie die tyd is verby...Ek groet sonder woorde want hartseer is stom."”