Nuusagenda

Onteieningswet-hofsaak (Dag 4)
AfriForum se hofsaak teen die Onteieningswet duur voort in die Wes-Kaapse Hooggeregshof. President Cyril Ramaphosa se regspan, onder leiding van adv. Hamilton Maenetje SC, sit vandag hul betoog voort.
President Cyril Ramaphosa se regspan het die hof gevra om die uitdagings teen die Onteieningswet van die hand te wys. Adv. Hamilton Maenetje SC voer aan dat die wet nie ongrondwetlik op eiendomsregte inbreuk maak nie en dat nul-vergoeding slegs in uitsonderlike gevalle moontlik is, solank dit billik en regverdig bly.
Dean Macpherson, DA-minister van Openbare Werke, het aangedui hy sal die hof se uitspraak eerbiedig, al daag sy eie party die wet uit. Hy beklemtoon dat onteieningsbevoegdhede nodig is vir projekte soos Eskom se R440 miljard se transmissielyne.
Gister het Maenetje toegegee dat “nul-vergoeding” inderdaad “niks” beteken. Die regters het hom skerp uitgevra oor waarom hierdie opsie in die wet ingeskryf is.
ANC, regering en politiek
Ramaphosa en gesondheidsminister Aaron Motsoaledi het by die opening van die King Nyabela-hospitaal in Mpumalanga herhaal dat die Nasionale Gesondheidsversekering (NGV) nie onderhandelbaar is nie. “Dit gaan gebeur, of julle dit wil hê of nie,” het Ramaphosa gesê.
Nuwe peilings wys die ANC is op 34% – byna ’n rekordlaagtepunt. Die party is in terminale agteruitgang, veral in Johannesburg waar dit onder 20% peil.
Die parlementêre afsettingskomitee gaan die president versoek om te verskyn, maar hy sal nie die eerste getuie wees nie.
Misdaad en veiligheid
AfriForum se ongeveer 10 000 buurtwaglede bly ’n sleutelrol speel in gemeenskapsveiligheid. Nog 11 lede is as deel van die protospanne opgelei.
Weer: Sneeu en kouefront op pad
’n Sterk kouefront, gepaard met ’n diep bolugtrog, gaan Sondag die Wes- en Noord-Kaap tref en koue, nat en winderige toestande oor die langnaweek bring.
Weermodelle dui nou weer op moontlike sneeu in Gauteng tussen Maandag en Dinsdag (9–11 Augustus). Johannesburg is terug op die radar, al is daar steeds onsekerheid. Dit kan met reën gemeng wees en dalk nie oral lê nie.
Sneeu word ook in tot agt provinsies aangedui, met swaar valle op plekke. Die Weerdiens waarsku dat toestande vinnig kan verander, maar ’n groot koue-uitbarsting is beslis op pad.

Onteieningswet-hofsaak: Dag 3 in Kaapstad
Die hofsaak teen die Onteieningswet gaan voort in die Wes-Kaapse Hooggeregshof. Dit is die derde dag van verrigtinge.  President Cyril Ramaphosa se regspan begin argumenteer ten gunste van onteiening sonder vergoeding. Hulle voer aan dat kern-grondwetlike regte, soos die reg op private eiendom, ondergeskik moet wees aan politieke doelwitte soos grondherverdeling. Die plasing kritiseer dié standpunt as bewys dat die president se verbintenis tot eiendomsreg slegs strek sover dit nie die ANC se agenda in die pad staan nie.
AfriForum se regspan het gister geargumenteer dat “nul-vergoeding” nie as vergoeding kragtens artikel 25 van die Grondwet kwalifiseer nie. Kallie Kriel verduidelik dit treffend op X dat sy bank toep weier om sy dogter nul te betaal as hy so transaksie probeer maak.
Die hof het minister Dean Macpherson  aangespreek omdat hy geen amptelike standpunt in die saak ingeneem het nie. Kallie Kriel het gewaarsku dat munisipaliteite onder MK-beheer ná die November-verkiesing die wet kan misbruik. AfriForum berei ook regstappe voor teen Julius Malema oor sy onlangse oproep tot grondbesetting, aangesien dit in stryd is met ’n vorige hofbevel.
Politiek en verkiesings
March and March het bevestig dat hulle nie ’n politieke party wil stig nie, maar eerder “’n AfriForum vir swart Suid-Afrikaners” wil word. Die rekening vir die herbou van die parlementsgebou het verdubbel, en die DA eis volle aanspreeklikheid. Gayton McKenzie se departement kon steeds nie aan die parlement verduidelik waaraan die R31 miljoen vir die Sokkerwêreldbeker bestee is nie. ’n Nuwe peiling wys die ANC se steun op 34% – naby sy laagste vlak ooit – met die DA op 27% en MK op 15%.
Munisipale en plaaslike regering
Die DA steun Kaapstad se stryd om meer bevoegdhede vir metropolisie. Die DA sê ’n proklamasie bewys dat die ANC nie Mangaung kan regeer nie. Die Valke ondersoek korrupsiebewerings by die Knysna-munisipaliteit. Die Sobukwe-familie het ’n skenking van Johann Rupert vir die herstel van die Robert Sobukwe-museum geweier weens sy beweerde bande met AfriForum.
Onderwys en rugbywedstryd
Alle spelers en persone betrokke by die geweld ná die rugbywedstryd tussen Hoërskool Dr. E.G. Jansen en Menlopark is voorlopig geskors. E.G. Jansen hou vol dat rassistiese opmerkings die voorval voorafgegaan het, terwyl Menlopark dit ontken. Unisa het teruggekap teen kritiek ná die dood van personeellede. Minister Siviwe Gwarube  noem dat geen hofaansoek die inwerkingstelling van die Bela-wet kan stuit nie.

Onteieningswet-hofsaak: Dag 2 in Kaapstad
Die dominante storie is die voortsetting van die hofsaak teen die Onteieningswet in die Wes-Kaapse Hooggeregshof. AfriForum, die DA, Vaderlandstigting en IRR Legal daag die wet uit. AfriForum fokus sterk op artikels 12(3), 12(4) en 19 wat onteiening sonder vergoeding of vóór hofbeslissing moontlik maak. Die organisasie argumenteer dat hierdie bepalings strydig is met artikel 25 van die Grondwet. Kallie Kriel het beklemtoon dat die wet se potensiaal vir misbruik gemeet moet word aan hoe ’n korrupte politikus dit kan gebruik, nie aan die bedoelinge van ’n verantwoordelike een nie. Die DA fokus meer op prosedurele gebreke in die parlementêre proses, terwyl AfriForum bereid is om slegs die problematiese artikels te laat wysig eerder as die hele wet te laat nietig verklaar. AfriForum is gereed om ‘enduit te veg’ met die hofsaak.
Verkiesings 2026: Registrasie en politieke beweging
Die plaaslike verkiesing is drie maande weg. Die kiesersrol het reeds 29 miljoen oorskry nadat 1,7 miljoen mense die afgelope naweek geregistreer of hul besonderhede nagegaan het. Die verkiesingsdatum word Vrydag amptelik afgekondig. Analiste wys dat ongeveer 70% van kiesers reeds besluit het, wat die oorblywende stryd om onbesliste kiesers intens maak.
March and March stig eie regstruktuur
Die March and March-beweging het ’n nie-winsgewende organisasie, SA First Forum, gestig om litigasie oor immigrasie, menseregte en klasaksies te doen. Die leierskap sê openlik hulle wil “soos AfriForum” word – ’n burgerlike organisasie wat namens gewone mense litigeer.
Waterkrisis en munisipale mislukking
AfriForum begin sy jaarlikse watergehaltewaarnemingsprojek en sal bykans 160 plekke landwyd toets. In Mogale City (Krugersdorp) bly die Percy Stewart-rioolwerke ’n ernstige besoedelingsbron vir die Cradle of Humankind, ten spyte van opgraderings. In eThekwini het ’n tragedie die aanhoudende waterkrisis weer onder die vergrootglas geplaas.
Gemeenskapsveiligheid en misdaad
AfriForum beklemtoon die rol van sy buurtwagte en vra steun vir opleiding en toerusting. In Kaapstad het die stad ’n interregeringgeskil aanhangig gemaak om meer polisiebevoegdhede vir metros te verkry. In Pretoria veg ’n man om sy lewe nadat hy in ’n huisroof geskiet is.
Onderwys en rugby
Die Hoërskool Dr. E.G. Jansen het beweer dat oudleerlinge van Menlopark rassistiese opmerkings (insluitend die k-woord en “plaas”-verwysings) gemaak het wat tot geweld ná ’n rugbywedstryd gelei het. Menlopark het die bewerings ontken.

Onteieningswet in die hof
Die Hooggeregshof in Kaapstad begin vandag met die aanhoor van verskeie konstitusionele uitdagings teen die Onteieningswet. AfriForum, die Instituut vir Rasseverhoudinge (IRR Legal), die DA en die Vaderland-stigting daag die wet uit. AfriForum argumenteer dat klousules wat onteiening sonder vergoeding moontlik maak, ongrondwetlik is. Die saak word deur ’n volbank regters aangehoor en sal na verwagting die hele week duur. Kallie Kriel sê AfriForum het ’n sterk regspan aangestel om die wet met mening te beveg.
Malema veg om RDK-pos te behou te midde van hofuitdaging
Julius Malema veg om sy pos in die Regterlike Dienskommissie te behou. Die Helen Suzman-stigting daag sy geskiktheid uit weens herhaalde aanvalle op regters. Speaker Thoko Didiza sê die Grondwet gee haar geen mag om hom te verwyder nie.
Plaaslike regering en politiek
Die Pretoriase Hooggeregshof het die skorsing van Tshwane se stadsbestuurder Johann Mettler tersyde gestel – ’n oorwinning vir Solidariteit en die DA. In Mangaung ontken die metro dat Naval Hill te koop is. KSA vra intussen R500 miljoen van die regering om stadions vir die 2027 Krieketwêreldbeker op te gradeer.
Misdaad en veiligheid
’n Nuwe interaktiewe webwerf dokumenteer reeds meer as 3 000 name van plaasmoordslagoffers. Net 62 uit 371 beweerde leiers van georganiseerde misdaadsindikate is skuldig bevind. Lt.genl. Jan Scheepers is as nuwe polisiehoof van Limpopo aangestel.
Ekonomie
Petrol daal van Woensdag met 14c tot 19c per liter, terwyl diesel met tussen R1,42 en R1,60 styg. Eskom het 441 dae sonder beurtkrag agter die rug. President Ramaphosa steun die skeiding van Eskom se transmissiebates. Vervaardigersentiment het tot die laagste vlak in sewe maande gedaal.
Onderwys en sport
Akademia se nuwe kampus in Pretoria vorder vinnig. Twee skolerugbywedstryde is gestop weens bakleiery en beweerde rasse-uitlatings. ’n Private netballiga gaan hof toe nadat spelers gedreig is dat hulle nie vir provinsiale kleure oorweeg sal word nie.
Sneeu voorspel vir 9 tot 11 Augustus
Sneeu word vir 9 tot 11 Augustus oor groot dele van Suid-Afrika en Lesotho voorspel volgens Snow Report. Die meeste gebiede kan 0-10 cm kry, terwyl hoër dele van die Oos-Kaap, Drakensberge en Lesotho moontlik 10 cm of meer sneeu kan verwag

AfriForum voorsien water tydens president se besoek aan Govan Mbeki
President Cyril Ramaphosa besoek die Govan Mbeki-munisipaliteit, waar duisende inwoners reeds twee weke sonder water sit. AfriForum het intussen 320 000 liter water gratis aan inwoners, skole en tehuise voorsien. Die organisasie het selfs ’n padkaart na sy noodwaterpunt aan die president se kantoor gestuur. Sekere skole in Secunda moes klasse opskort weens die watertekort.
Tshwane-hofsaak: Uitspraak vandag verwag
Die Hooggeregshof in Pretoria beslis vandag oor die toekoms van stadsbestuurder Johann Mettler en CFO Gareth Mnisi. Die DA wil die skorsing van Mettler en die heraanstelling van Mnisi omkeer. Intussen is daar nuwe twis oor ’n raadsvergadering wat volgens die DA, VF Plus en ander nie behoorlik gekonstitueer was nie.
Bestuurslisensies word 10 jaar geldig
Die kabinet het goedgekeur dat bestuurderslisensies vir ligte voertuie en motorfietse van vyf na 10 jaar verleng word. AfriForum, wat jare lank hiervoor geveg het, verwelkom die besluit as ’n praktiese verligting.
AfriForum keer verkoop van Bloemfontein se erfeniseiendomme
Die Mangaung-metro mag nie voortgaan met die verkoop of langtermynverhuring van 153 munisipale eiendomme, insluitend Naval Hill, nie. AfriForum het ’n interdik bekom wat die proses stop totdat die regmatige prosedures bewys is.
Senzo Meyiwa-saak: Meesterbrein nog vry
AfriForum se privaatvervolgingseenheid sê daar is genoeg getuienis dat ’n meesterbrein agter die moord op Senzo Meyiwa staan. Die organisasie glo dié persoon behoort saam met die vyf beskuldigdes te verhoor te word.
Veldbrande en nuwe polisiehoof
Veldbrande het duisende hektaar in Limpopo vernietig, met meer as 11 000 ha in die Sterkrivier-omgewing alleen. Lt.genl. Jan Scheepers is as nuwe polisiekommissaris van Limpopo aangewys.
Media24 raadpleeg personeel oor nuwe redaksionele model
Media24 het Vrydag begin om personeel te raadpleeg oor ’n nuwe redaksionele bedryfsmodel. Die proses word gelei deur aangewese uitvoerende hoof Minette Ferreira om die media-afdeling se werking te herstruktureer. Die nuus is bekend gemaak op News 24 en Netwerk 24.

News24 se AfriForum-artikel: Die skandaal wat nie was nie
Die nasleep van News24 se ondersoek na AfriForum se finansies bly dominant. Verskeie kommentators, insluitend Leigh-Ann Hallak, beskryf die artikel as “die skandaal wat nie ’n skandaal was nie”. Daar is geen bewerings van bedrog, diefstal of wanbestuur nie – slegs kritiek op salarisse, bemarking en lidwerwing.  Ernst van Zyl het gewys op die ironie dat kritici van Afrikaner-organisasie enige vorm van Afrikaanse organisasie as ’n “gevaar” beskou.
Hofbeskerming vir Bloemfontein se openbare eiendom
AfriForum het ’n suksesvolle skikking met die Mangaung-metro bereik. Die metro mag nie voortgaan om 153 geadverteerde munisipale eiendomme, insluitend die Tempe-lughawe en Franklin-natuurreservaat, te verkoop totdat die hofsaak afgehandel is nie. AfriForum argumenteer dat die regte wetsprosesse nie gevolg is nie.
Kabinet verleng bestuurderslisensies tot 10 jaar
Die kabinet het goedgekeur dat die geldigheid van bestuurderslisensies vir ligte voertuie en motorfietse van vyf na 10 jaar verleng word. AfriForum veg al jare lank hiervoor en verwelkom die besluit as ’n praktiese verligting vir motoriste.
Tshwane: Uitspraak oor Mettler se skorsing Vrydag verwag
Die hofsaak oor die skorsing van stadsbestuurder Johann Mettler se uitspraak word Vrydag verwag. Solidariteit het gevra dat hy intussen heraangestel word, terwyl die DA argumenteer dat die raad konstruktiewe minagting van die hof gepleeg het.
Waterregte in regering se visier waarsku AfriForum
 AfriForum hou vol dat die implementering van die Nasionale Waterwysigingswetsontwerp van 2026 in sy huidige vorm verreikende bykomende magte oor die toekenning van waterregte vir produktiewe aanwending aan die regering sal gee. Die burgerregteorganisasie meen die implementering van die wetsontwerp sal uiteenlopende risiko’s inhou en onder meer beleggings ontmoedig, finansieringsrisiko’s verhoog en produksie en indiensneming in waterafhanklike sektore soos landbou onder verdere druk plaas.
Plaasmoorde: Waarom die syfers daal
AfriForum het ’n video vrygestel wat verduidelik waarom plaasmoorde afneem. Die organisasie skryf dit toe aan gemeenskapstrukture, opleiding, hommeltuie, radio-netwerke en vinnige reaksiespanne, eerder as regeringsoptrede. Hulle beklemtoon dat gewelddadige plaasaanvalle steeds hoog bly.

News24 vs AfriForum: Die stryd duur voort
Flip Buys het News24 se redakteur Adriaan Basson skerp gekritiseer as ’n “bloedhond” teen Afrikaans en ’n “skoothondjie” van die ANC. Hy argumenteer dat die media se rol dié van waghond is, nie aktivis of politieke bondgenoot nie. Dr. Ernst Roets het in ’n ontleding aangevoer dat News24 se artikel oor AfriForum se finansies geen werklike skandaal blootgelê het nie – daar is geen bewerings van bedrog of wanbestuur nie. Ernst van Zyl het AfriForum se praktiese werk beklemtoon, insluitend 177 buurt- en plaaswagte, hommeltuie en radio-netwerke wat bydra tot die afname in plaasmoorde.
Tesourie laat R7,1 miljard los ondanks oortredings
Die Nasionale Tesourie het besluit om R7,1 miljard aan terughoude billikedeel-toekennings aan 49 munisipaliteite vry te stel, ondanks volgehoue oortredings van die Munisipale Finansiewet. Minister Enoch Godongwana het dit geregverdig om dienslewering aan arm gemeenskappe te beskerm, maar kritici sien dit as ’n verswakking van aanspreeklikheid. Hy het ook gewaarsku dat staatsdepartemente wat munisipaliteite skuld, vanaf September dieselfde behandeling kan verwag.
Selfregerende gemeenskappe groei te midde van staatsverval
Prof. Koos Malan argumenteer dat gemeenskappe in Suid-Afrika stilweg selfregerende “mikro-republieke” word namate staatsinstellings verswak. Hy sien dit as ’n reaksie op staatsverval en moontlik die begin van ’n nuwe grondwetlike era van parallelle strukture en plaaslike selfbestuur.
Mbalula verdedig SEB en duur ANC-dinee
Fikile Mbalula het herhaal dat swart ekonomiese bemagtiging die “aanvalle” sal oorleef. Hy het ook ’n ANC-dinee verdedig waar ’n tafel met Gauteng-premier Panyaza Lesufi R1 miljoen kos, en gesê daar is niks verkeerd daarmee om fondse so in te samel nie.
Inheemse tale moet volle regstatus kry – Nel
Adjunkminister Andries Nel het gevra dat inheemse tale nie net tolktale moet bly nie, maar ontwikkel moet word tot volle regstale vir onderrig, uitsprake en regspraak. “Taal is die lewensbloed van die reg,” het hy gesê.
Akademia verdedig institusionele pluralisme
Marthinus Visser van Akademia het Jonathan Jansen se kritiek op Afrikaanse private universiteite beantwoord. Hy argumenteer dat die werklike vraag is of Suid-Afrika se demokrasie ruimte het vir meer as een tipe universiteit – ’n pluralistiese benadering eerder as uniformiteit.
Sneeu het in dele van die Drakensberg geval, terwyl KwaZulu-Natal vir erge weer voorberei.
Sneeu val in dele van die Drakensberg, insluitend Sani-pas en Mount Fletcher. Paaie is glad en gevaarlik weens ys en mis, terwyl owerhede motoriste waarsku.

News24 se aanval op AfriForum het skouspelagtig misluk
News24 se berig oor AfriForum se finansies bly die oorheersende storie. Die publikasie beweer die organisasie spandeer die grootste deel van sy inkomste op salarisse en bemarking. AfriForum het skerp gereageer. Kallie Kriel beklemtoon dat die organisasie vir 20 agtereenvolgende jare skoon oudits ontvang het – teenoor slegs 15% van munisipaliteite wat dieselfde prestasie lewer. Hy beskryf die berig as deel van ’n langdurige heksejag wat juis AfriForum se steun versterk.
Verskeie kommentators soos Gareth Cliff,  Joe Emilio en Renaldo Gouws  het die stuk as ’n smeerveldtog eerder as objektiewe joernalistiek afgemaak. Kriel wys uit dat die News24 se aanval op AfriForum het skouspelagtig misluk het.
Solidariteit in Washington
Verteenwoordigers van die Solidariteit Beweging, Jaco Kleynhans en Werner Human, het in Washington met assistent-sekretaris Garcia van die Bureau of African Affairs ontmoet. Die gesprek het gegaan oor kwessies wat die Afrikanergemeenskap raak en geleenthede om landelike veiligheid te verbeter, soos uitgelig in president Trump se uitvoerende bevel. Kallie Kriel het die besoek as belangrike grondwerk verwelkom.
Die Suid-Afrikaanse regering het intussen ’n hofaansoek geloods om ’n regsgeding te blokkeer wat militêre uitvoere na die VSA wil stop.
Tesourie stel R7,1 miljard se terughoude munisipale toelaes vanaf 31 Julie vry
Nasionale Tesourie gaan vanaf 31 Julie 2026 die oorblywende terughoude plaaslike regeringsubsidies vrystel. ’n Totaal van R7,1 miljard word aan munisipaliteite uitbetaal.
Munisipale en diensleweringskrisisse
SAMWU in die Vrystaat sê die Nasionale Tesourie se terughouding van toelaes help nie munisipaliteite wat al maande lank nie salarisse kan betaal nie. In Tshwane staan ’n hofsaak voor die deur ná ’n omstrede raadstemming, terwyl Johannesburg steeds met ’n afvalagterstand sukkel. Die waterkrisis bly ernstig: die minister sê R400 miljard word benodig om die stelsel reg te kry, en in Govan Mbeki-munisipaliteit is daar al tien dae sonder water.
Stellenbosch-plaasaanvalle
’n Reeks gewapende roofaanvalle teiken plase en wynlandgoedere rondom Stellenbosch. ’n Paar is Vrydag op Neethlingshof Estate met koevoete aangerand; die man het ’n gebreekte skedel opgedoen. Inwoners sê minstens vyf soortgelyke aanvalle het die afgelope drie maande in die omgewing plaasgevind.

AfriForum antwoord op News24 se heksejag
AfriForum se uitvoerende hoof, Kallie Kriel, beskryf News24 se artikel as ’n ideologiese heksejag wat die teenoorgestelde van sy doel bereik. Hy sê die aanvalle versterk AfriForum se steunbasis en ondermyn News24 se geloofwaardigheid verder.
Kriel beklemtoon dat AfriForum oop is oor sy finansies en altyd skoon oudits ontvang, terwyl News24 weier om vrae oor sy eie geld, Naspers se skenkings aan die ANC, en die stilte oor finansiële state sedert 2021 te beantwoord. Hy gee ’n uitgebreide uiteensetting van hoe die maandelikse R22,6 miljoen bestee word aan veiligheid, gemeenskapsprojekte, hofsake en kultuur, en sê 70% gaan na selfdoen oplossings teen staatsverval.
News 24 artikel
News24 se ondersoek beweer AfriForum het tussen 2019 en 2024 meer as R1,6 miljard van lede en skenkers ontvang, maar net R2 uit elke R10 direk aan projekte bestee. Byna 60% van die inkomste (meer as R910 miljoen) het na salarisse (R589 miljoen) en bemarking (R321 miljoen) gegaan.
-         Foute in News24 se artikel en die groter raamwerk
Belangekonflik word nie openlik hanteer nie
Die ondersoek is befonds met hulp van die Truth First Foundation, waarvan News24 se eie hoofredakteur, Adriaan Basson, ’n direkteur is. Hierdie verband word slegs in ’n kort slotnota genoem. Die gebrek aan duidelike afstand tussen die befondser, die redakteur en die nuuskamer skep ’n ernstige persepsieprobleem van onafhanklikheid.
Renaldo Gouws vra in sy video waarom Media24 oor twee jaar meer as 100 negatiewe artikels oor AfriForum publiseer, en wat die mediagroep self probeer wegsteek. Die kommentaar onder die artikel was ook bloedband van kritiek teen News 24 waar slegs subskripsie lede aan kan deelneem.
Swaar gelaaide ideologiese taal
Die artikel gebruik herhaaldelik belaaide beskrywings soos “Afrikaner nationalist”, “splurges”, “apartheid-era nostalgia” en “sells a message of state collapse”. Hierdie formulering is nie neutraal nie. Dit raam AfriForum van die begin af as moreel verdag en ondermyn die aanspraak op objektiewe ondersoekende joernalistiek. Daar is ook etiese vrae rondom die joernalis wat die ondersoek gedoen het se vorige etiese optredes met ander ondersoeke.
News24 stel “direkte projekkoste” (R304 miljoen) teenoor salarisse en bemarking (R910 miljoen) asof die laasgenoemde nie met projekte verband hou nie. Salarisse van personeel wat buurtwagte, gemeenskapspanne en regswerk koördineer, word nie as projekverwante koste erken nie. Daar is foute soos Werner Human  wat vir AfriForum werk en ‘n reuse vergoeding ontvang. Human het nog geen vergoeding van AfriForum ontvang nie en sluit later die jaar by AfriForum aan.

AfriForum versoek dringende insae in McKenzie se sokkerwêreldbeker-uitgawes
AfriForum het die Departement van Sport, Kuns en Kultuur 30 dae gegee om volledige finansiële rekords, fakture en ouditverslae te verskaf oor minister Gayton McKenzie se R31 miljoen-reis na die Sokkerwêreldbeker. Die organisasie beskou die minister se verklaring as onvoldoende deursigtig.
Hofstryd teen die hernoeming van Graaff-Reinet
Terselfdertyd gaan die hofstryd teen die hernoeming van Graaff-Reinet voort. AfriForum beklemtoon dat die openbare deelnameproses misken is en dat die meerderheid inwoners teen die naamsverandering gekant is.
Die Burger beskryf dat vandag in sy hoofartikel soos volg: “Die kern van die probleem lê in die minagting van die openbare mening. Publisering in die Staatskoerant moet die eindpunt van ’n deursigtige proses wees. In hierdie geval is die name bekragtig ten spyte van meer as 38 000 formele besware.”
Fout met tariewe en ander litigasie
AfriForum  se hofwerk oor onwettige elektrisiteitstariewe in Johannesburg en Ekurhuleni dreig nou met massa terugbetalings, nadat Nersa herhaaldelik hofbevele geïgnoreer het. AfriForum se privaatvervolgingseenheid het ook skerp gereageer op landdros Dube in Brits, wat ’n kinderverkragtingsaak misgeloop het om ’n welstandseminaar by te woon.
Landswye massapatrollie
Vanaand begin AfriForum se landswye massapatrollie met 177 buurtwagte.
Munisipale skuldkrisis bly ‘n groot uitdaging wat plaaslike verkiesing gaan oorheers
Die munisipale skuldkrisis bly kritiek. Munisipaliteite skuld gesamentlik meer as R161 miljard, waarvan net vier – Matjhabeng, Emfuleni, Emalahleni en Johannesburg – saam meer as R50 miljard opeisbaar is. Onwettige tariewe, waterprobleme en diensmislukkings bly die daaglikse realiteit vir miljoene belastingbetalers.
“Ryan Coetzee se firma kry R7,7 miljoen om DA se RNE toetrede te bestuur
Op politieke vlak is die DA onder skoot nadat onthul is dat die party ’n geheime kontrak van meer as R7,7 miljoen met die Dubai-gebaseerde konsultasiemaatskappy Consulum aangegaan het om sy RNE-werking te bestuur. Ryan Coetzee, wat ’n sleutelrol in die onderhandelings gespeel het, was destyds uitvoerende hoof van die maatskappy.
Hof stuit parlement se afsettingskomitee oor Phala Phala
Die hof het die Phala Phala-afsettingskomitee tydelik gestuit hangende president Ramaphosa se aansoek om die onafhanklike paneel se verslag te hersien en tersyde te stel.